مسلسل جديد اخراج الامن المصري

اظن كلكوا تابعتوا حلقة التفجير اللي حصل في الحسين انا مبقولش ان دة كان تمثيليةولا لأ. انا بس اللي غاظني اوي طبعا غير تصريحات ان مصر بلد الامن و الامان لان رئيسها حسني مبارك و غير تصريحات ان الارهاب في كل بلاد الدنيا. اللي غاظني اكتر لما الداخلية بتقول ان واحدة راحت تشهد في القضية دي قالت ايه بقى الست دي؟؟؟؟؟؟؟؟؟؟؟؟
بتقول الست دي انها كانت هناك بتفسح ولادها وشافت واحد بيرمي كيس من فوق الفندق وواحد تاني تحت راح واخد الكيس دة و حطه تحت الكرسي الحجري اللي قالوا عليه دة وبعدها حصل التفجير المهم بعدها الراجلين دول ركبوا تاكسي كان مستنيهم فيه واحد بدقن غير السواق والتاكسي جري راحت هي بقى رايحة وراهم بالعربية والسواق وداهم بيت في حلمية الزيتون و مشي هي بقى سألت واحد فاتح محل تحت البيت قالها دة واحد اسمه ناصر والتاني اسمه مروان و هي كانت عايزة تصورهم بس خافت ياخدوا بالهم
بسم الله ما شاء الله الدور دة ينفع ليسرا معرفش افتكرت مسلسلات يسرا ليه. المهم ما شاء الله الست مخافتش كانت شجاعة ماهي حفيدة الفراعنة بقى لالالالالالالالا قصدي ان رئيسها حسني مبارك عشان كدة تلاقوها مخافتش على نفسها و لا على ولادها وراحت رايحة وراهم تشوف هم مين لأ و ايه و معاها ولادها مش عارفة ليه عايزة اظغرط ياريتني بعرف. لا واللي كان مستنيهم في العربية بدقن سودا على اساس ان الدقن دي بقت بطاقة الارهابيين في العالم فهو كان مطول دقنه في تفجير الحسين عشان اللي يشوفه يعرف انه هو ارهابي.
دة ايه الحبكة الدرامية دي دة ولا اسامة انور عكاشة يعرف يكتبها
انا مبدافعش طبعا عن اي حد يفكر يعمل عمل ارهابي .دة لو التفجير دة فعلا عمل ارهابي. انا بس بقصد ياريت يعرفوا ان الناس مبقتش تصدق اي حاجة بقوا يقولوها زي ان المجرم مريض نفسيا او كان بدقن او الهبل دة
مش هقول تاني اكتر من حسبنا الله و نعم الوكيل

من النهاردة مفيش قضاء...أنا القضاء

انا مش عارفة اقول ايه للقرار الانساني "الحكيم" اللي صدر بالعفو الرئاسي عن مسجل الخطر المدعى "ابراهيم عيسى"بجد قرار كله حكمة و أبوة و حنية قلب الام بقى
طبعا مفيش حد مختلف ان من الاول القضية دي قضية غبية اصلا مكانش المفروض تترفع و طبعا كلنا زعلنا بالحكم بتاع حبس شهرين بس اللي زعلتله اكتر قرار العفو الرئاسي دة ....واحد هيقولي انتي عايزة ايه يتحبس يعني اقوله لا طبعا ....بس انتوا داوشينا مفيش تعقيب على احكام القضاء و القضاء فوق الجميع و الكلام اللي مبيأكلش عيش دة و منين ان لماالقضاء يقول ان ابراهيم عيسى يتحبس شهرين ، حسني مبارك يطلع قرار رئاسي بالعفو عنه ....عمرك سمعت في اي دولة محترمة ان الرئيس يطلع قرار بيخالف قرار القضاء والدولة تنفذ قرار الرئيس..اه صح انا نسيت دة في الدول المحترمة بس.
طبعا هو لو في دولة محترمة من الاصل مكانش اتحبس عشان مقالات كتبها بس ما علينا انا بكتب عشان اقول حاجة تانية.
انا بقول كدة عشان حتى لو ابراهيم عيسى مقالش حاجة تخليه يتحبس و القضاء قال انه يتحبس مينفعش رئيس الدولة "دة لو محترمة طبعا زي ما اتفقنا" يقول انه ميتحبسش لان دة اكبر دليل ان مفيش قضاء في مصر وان النظام الحاكم اكبر من سلطة القضاء دة ايه الخيبة دي
وبعدين لما هو حنين اوي على "أحد ابناء هذا الوطن" زي ما بيقول ما طلعش القرار دة م الاول ليه ولا هو عمل كدة عشان نقول شوفت الاب الحنون يا سلام برضه مقدرش يتخلى عن أحد اولاده ...زي الافلام بالضبط تيجي تقول خلاص البطل هيموت و تيجي كلمة القدر في اخر لحظة انه ميموتش
على قد ما فرحنا ان ابراهيم عيسى مش هيتحبس زعلت اوي اوي اوي اوي ان بقى دة الحال في مصر بعد كدة متدوشوش دماغنا بسلطة القضاء اللي فوق كل الناس و الاحكام اللي مالهاش تعقيب...حسبي الله و نعم الوكيل

اضراب عام لشعب مصر يوم 6 ابريل

انا قريت على النت وجتلى رسائل على الموبيل ان فى اضراب عام يوم 6 ابريل للاعتراض عن الغلاء المفرط والارتفاع الجنونى فى الاسعار ومن ناحية اخرى المرتبات والدخل ما بيتحركوش و مافيش ربط بينهم و بين الارتفاع الجنونى فى الاسعار
وكأن الحكومة والبلد عايزنا نضرب دمغنا فى الحيط .........

عجبتنى الفكرة وفكرت ان احنا ممكن ندعم الفكرة باضراب عام عن الشراء نعمل اضراب عن شراء اى سلع فى اليوم ده وياريت منكنش سلبين ونشارك كلنا فى الاضراب بأى صوره من الصور ....... مفيش حاجة فى البلد ممكن تتغيير واحنا واقفين نتفرج و نمصمص شفايفنا و نقول حسبى الله ونعم الوكيل ..... ومش هتتغير لو عدد قليل هو بس اللى اعترض و الباقى وقف يتفرج............ لو مكناش 70 مليون ضد حكومة فاسدة وظالمة ومرتشية مفيش اى حاجة هتتغير وساعتها اياك تقول ان الحكومة بس هى السبب فى انك مش لاقى تاكل لازم تعترف انك ساعدت الحكومة بانك واقف تتفرج عليها وهى بتتدبح فيك وفى اهلك وفينا كلنا .

6 ابريل ............ اضراب عام للشعب المصرى


و بالنسبه لهذا الجروب و هو يعتبر الأن اقوى و اكبر و انشط التجمعات الداعيه للإضراب فقد تم الاتفاق حتى الان على الاتى
1- الاجماع على تعليق علم مصر فى البلكونات

2- الاجماع على ارتداء ملابس سوداء و يفضل مطبوع عليها اى شعار للإضراب لو
امكن مع حمل شاره او اى اعلان عن "إنى مضرب إحتجاجا على الأسعار

3- تم بالإجماع الاتفاق على الإضراب عن شراء أى سلعه لتمثل وسيلة تهديد للحكومه التى لا تعيرنا اى انتباه و لا تحترم وجودنا ولا تحس بمعاناتنا و كذلك الاضراب عن شراء السلع يعتبر تهديد لاى تاجر يرفع الاسعار اننا يمكن ان نتحد لمواجهته
عند حدوث حالة شلل فى هذا اليوم سيفكر الجشعون الاف المرات امام هذا الشعب الواعى

4- تم الاتفاق على ان يحاول الجميع قدر استطاعته بكل السبل على الاضراب عن العمل و الغياب عن العمل هذا اليوم و اعلان ذلك قبلها و اعلان الاضراب

5- اجمع جميع الطلبه على الاضراب عن الدراسه فى ذلك اليوم و اعلان ذلك مسبقا

6- لإصحاب المهن الحرجه كالطبيب مثلا أو ما شابه و كذلك لمن لن يستطيع ابدا ابدا ان يمتنع عن العمل و كذلك بالنسبه للطلبه الذى يتوافق 6 ابريل مع امتحاناتهم فإنهم سيضطرون للذهاب لمصالحهم مع اعلان الاضراب لبعض أو كل الوقت و كذلك الاعتصام السلمى فى مجموعات إن امكن

7- على من يستطيع النزول للتظاهرات التى ستكون فى الميادين الرئيسيه بالمحافظات يمكنه ذلك و لكن بعد الاتفاق مع القوى السياسيه و منظمات المجتمع المدنى على ميعاد و مكان التظاهرات .. و حتى الان تم الاتفاق على ميدان التحرير فى القاهره .. و ميدان الحقانيه بالاسكندريه ... و ميدان الساعه بدمنهور
.. و ميدان المحطه بالشرقيه ... و امام مبنى المحافظه بالمنصوره
و ستبدا الوقفات الإحتجاجيه الساعه الحاديه عشر و تستمر طوال اليوم فى اسلوب متحضر محترم بدون أى سلوك او الفاظ غير لائقين
و خيار التظاهر مفتوح لمن يريد .. و من لا يريد عليه الختيار أحد الاختيارات من كل الاختيارات السابق ذكرها

8- على الجميع العمل بجد منذ اليوم حتى يوم 6 ابريل على نشر كل تلك الافكار بين الشعب المصرى و هم اهلنا و اصحابنا و اقاربنا و زملائنا فى العمل مستخدمين فى ذلك كل الوسائل المشروعه من دعوات صريحه عامه او فرديه او ارسال رسائل محمول او مكالمات هاتفيه او البريد الالكترونى و المنتديات و المدونات و المواقع الاعلانيه و الجرائد و الصحف و المجلات و الاتصال بالفضائيات .. و كذلك تعليق الالافتات و ارتداء تى شيرت أو شاره يحمل الدعوه للإضراب من الان حتى ميعاد الاضراب
و على طلاب الجامعه نشر كل تلك الافكار بين اصدقائهم و زملائهم و محاولة النشر بكل الوسائل السلميه

9- طبقا للمناقشات اجمع معظم اعضاء الجروب و ايضا خارج الجروب على أن يوم 6 ابريل هو البدايه و ليس النهايه .. و أننا سنستمر فى الاضرابات و كافة صور الإحتجاجات بعد يوم 6 ابريل نستطيع نشر الفكره لأكبر عدد و إجبار الحكومه و صانعى القرار فى مصر على الانصياع لرغبة الشعب

8- لا تنسوا ورده لكل ضابط امن مركزى

و الله الموفق
الله .... الوطن

فضيحة لطنطاوي(شيخ الازهر )

انا بقى المرة دي مش هتكلم عشان ضغطي عالي من اللي شوفته و ياريت يا جماعة اللي عنده الضغط ميشوفش اللينك دة لحسن يروح فيها و تتهموني فيه
هقولكو بس حسبي الله و نعم الوكيل. دي فضيحة (مش قادرة اقول شيخ) طنطاوي بتاع الازهر و الاسلام كله برئ منه في موضوع منع الحجاب في فرنسا

http://www.youtube.com/watch?v=QKQFxwdniV0

الجيش العربي فييييييين!!!!!!!!!

الجيش العربي فين للشاعر محمد بهجت مسجل من برنامج العاشرة مساء شعر رائع اتفرج عليه و اتحسر على جيشنا العربي

http://www.youtube.com/watch?v=k_vfVb_NavM

جوة التمثيلية

و النبي مش عارفة الناس اللي بتقول ان امريكا و اسرائيل قلقانة من البرنامج النووي المصري و فاكرين نفسهم معارضة و بيشتموا في امريكا و اسرائيل مش عارفة الناس اللي بتقول كدة دول هبل و لا بيستهبلوا علينا بس انا برجح انهم بيستهبلوا علينا حد هيسألني "لييييييييييه يا ظالمة بتقولي كدة" اقولك فتح مخك معايا و النبي احسن مبحبش الغباء و اللي بيتغابو. الناس اللي بتقول كدة دول اكتر ناس عارفة ان مصر و السيد الرئيس بحكمته اللي هتودينا في داهية ميقدرش يدخل الحمام قبل ما يستأذن أمريكا و اسرائيل مش حتى عشان يعمل برنامج نووي و بعدين دة برنامج نووي لتوليد الكهربا متتخضوش أوي و النبي كدة من كلمة البرنامج النووي و تصدقوا اننا هنعمل قنبلة و بعدين مش حكمة السيد الرئيس هو نفسها الحكمة اللي كان بينصح صدام حسين انه يبعد عن اي اسلحة نووية ويعترف لماما امريكا لو عنده اي اسلحة نووية او حتى ان شا الله نواة بلح اشمعنى يعني دلوقتي هيتمرد على ولاة نعمته اللي طبعا انتو عارفينهم و عايز يخوفهم بالبرنامج اللي بيقول عليه و بعدين هو مش اهبل اوي كدة عشان يخوف اللي مشغلينه و عارف اللي ممكن يحصله لو بس حاول يطلع اي قرار اهبل حتى لو بانشاء كوبري من اللي خاوتنا بيهم ليل و نهار من غير ما يستأذن من امريكا و اسرائيل

و النبي مش عايزة دوشة و اللي هيقعد يقولي البرنامج النووي تاني و ان امريكا يا عيني اتخضت لما عرفت هولع فيه و في نفسي و في حكمة السيد الرئيس عشان الكلام دة معادش بياكل معانا

الله

ياااااااااااااااه وحشني الكتابة في البلوج اوي مع اني مش كنت عارفة اكتب ايه كنت بقول ايه هو انا بطلت افكر و اعيش و لا ايه و لا انا يمكن فضيت من جوة خلاص معدش فيه حاجة عايزة اقولها بس كنت بقعد اتأمل كتير اجمل حاجة التأمل في ملكوت ربنا يااااااااااااااه متتخيلوش اد ايه كنت بحس براحة كل اما ابص للسما بجد مهم اوي الواحد يتأمل كتير بحس انها حاجة كدة بتشحني طاقة سبحان الله الواحد بجد في المدن ميعرفش يعيش جو التأمل دة بحق و حقيقي و يسيب روحه تطير بين السحاب و تتمشى فوق القمر و تغني وسط الجبال تحت ضوء القمر اللي بيسمعها و تعوم وسط الموج بالليل ايه دة ايه دة هو انا ابتديت اكتب شعر و لا ايه بس مش ذنبى اعمل ايه بقى اذا كان ربنا خالقني بحب الطبيعة و احب التأمل بالطريقة دي بجد احنا فيه ناس مش حاسين بنعمة التأمل و تذوق الجمال طب و الله صعبانين عليا اصل الواحد في وسط القرف اللي بيشوفه و الحياة اللي مالهاش طعم لازم يقعد كدة ساعات في حتة بعيدة شوية عن بقيت كل البشر و يشحن نفسه طاقة ربنا لو مش رحيم بينا بجد مكنش هيخلق كل الحاجات الجمييييلة دي سبحانك يا الله عايزنا نتسم بالجمال من جوانا بس احنا اللي مش عايزين

تأملوااااااااا

هو مين اللي برة

قامت قوات الشرطة الشجاعة بالقبض على جماعة من معتنقي الفكر السلفي متلبسين باسلحتهم يوووووه قصدي بفكرهم

الحمد لله يااااااااااااااه كانت غمة و انزاحت صدقوا الواحد كان بجد مرعوب الحمد لله حكومتنا الحكيمة زي رئيسها بتمسك اي حد بيفكر اليومين دول ياريت بتمسكه عشان ارهابي و لا حتى بيفكر في حاجة ضد مصلحة البلد لالالالالالالالالالالالالالالالالالالالالالالالا يا شيخ قول كلام غير دة الحمد لله دلوقتي بيمسكوهم عشان بيفكروا هتقولي و ايه الدليل هقولك بيقبضوا على العلمانيين واحد هيقولي دول كفرة و لازم نتخلص منهم مااشي طب اشمعنى بيمسكوا الاخوان المسلمين . يعني الواحد هيفكر كدة و لا هيفكر كدهو هيتحبس هيتحبس و هو يعني فاكر انه هيفلت بالجريمة اللي عملها لا دة الحكومة الحمد لله مبيغمضلهاش جفن الحمد لله حبست الحرامية اللي سرقوا البنوك و هربوا برة و مسكوا ممدوح اسماعيل صاحب العبارة و اللي قتل 1000 مصري و مسكوا اللي بيسرق حبل الغسيل اللي على سطح جيراننا فلقوا جريمة بشعة يندى لها جبين الوطن الا و هي التفكير او الاعتقاد بشئ

الحمد لله هي كلمة حكمة اتقالت : الملك مينا وحد القطرين و حكمة السيد الرئيس محمد حسني مبارك وحد الاديان و البلد كلها بقت كافرة و الحمد لله

عشااااااااااان كدة بيمسكوا اي حد تاني لا يعتقد بحكمة السيد الرئيس و سمعني اجمد سلام للحكمة

حد رد عليا يا جدعاااااااااااااااااان ربنا يجبر بخاطرك يا سايكوووووووووووو

اخييييييييييييرااااااااااااااا لقيت حد يرد عليا يا جدعاااااااااااااااااااااااااااان انا مش مصدق نفسي يا لمبي والله عندك حق يا سايكو المهم اني ارتاح لما اكتب بس برضه ساعات الواحد بيحس انه عايز يحس ان اي حاجة بيقولها لها تاثير او اي حتى حد يرد عليه
روح يابني الهي ربنا يجبر بخاطرك و ميفضلكش بلوج من كومنتس (تعليقات يعني يا جماعة هاهاهاها) اهو الواحد بيكتب اي كلام اهبل بقى مش اهبل لحسن لو كتمت اللي عايزة اقوله ممكن الواحد يتجنن بس ساعات الواحد مبيقدرش يقول كل اللي جواه بس دة مش بيبقى عيب منه لالالالالالا بيبقى العيب من اللي حواليه اللي محسسينه انه لو قال رايه ممكن مش بس اللي حواليه يعارضوه لا دة كمان ممكن ينبذوه لمجرد انه بيفكر بطريقة مختلفة و المصيبة الكبيرة انه بيضطر يعمل نفسه مقتنع برأي اللي حواليه و دة طبعا لانه مش عايش لوحده في الدنيا دي
و يرجعوا يقولولك متكونش مزيف كون نفسك و بس متكونش حد تاني طب ازاي و انتوا حتى مش عايزني يبقى ليه رايي الخاص و لو حتى في حياتي الشخصية او الامور اللي مش هتضر اي حد تاني
بجد مجتمعنا يجبر الواحد انه يوصل لحل من الاتنين اما انه يكتئب و ينعزل عن الدنيا لانه مش قادر يتكيف مع اللي حواليه (وساعتها هيقولو عليه براوي و مبيحبش حد) يا اما ينتحر بقى و يخلص من حياته اللي مش عارف يعيشها بطريقته هو ( و ساعتها بقى يبقى ميت كافر و الحمد لله) ايهما افضل
و لو ان الشخص دة ممكن يكون نفسه يكون فعال بالنسبة لمجتمعه بس اللي حواليه يحبطوه اما بافكارهم المحبطة اما برفضهم له و لافكاره لمجرد انها مختلفة مع افكارهم مش مهم صح بقى غلط طب ليه هو فكر بالطريقة دي دة كله مش مهم المهم انه ابن ستين في سبعين و عميل للغرب المعادي للاسلام لمجرد ان تفكيره مختلف مع انه ممكن يكون بيحب بلده اكتر من اي حد تاني

مروحة سقف اوضتي

الساعة 6 الا ربع صباحاَ نايمة على سريري متنحة لمروحة السقف في اوضتي حاسة انها بالريشة المتجهة ناحيتي هتنط من المروحة و تدخل جوة بطني و الريشتين التانيين هيحضنوني و يكسروا ضلوعى حتى الموت خوفت اوىىىىىىىىى بصراحة حسيت ان المروحة فيها روح و عقل و بتفكر و ممكن تعمل كدة او يكون الكلام اللي بيقولوه انك ممكن تحرك الحاجات لمجرد انك تركز فيها شوية انا خوفت م المروحة و خفت من نفسي اني اركز اوي تقوم المروحة تقل عقلها و تقتلني
هو ايه الهبل اللي انا كتباه دة من بعد ما كنت بكتب عن البلد و احوالها ما تقولي سياسة و خلاص لا هو انتي فاكرة اللي انتي كنتي بتكتبيه دة سياسة انتي هبلة ايه دة ايه دة هو انا بكلم نفسي ولا ايه ربنا يستر المهم يعني من بعد ما كنت بكتب اللي بكتبه دة و بعد فترة انقطاع اقوم اكتب عن مروحة سقف اوضتي ربنا يشفي يمكن عشان حاسة ان اللي كنت بكتبه دة كلام اهبل ما يجيش حاجة في اللي بيتقال فمش هيزوده بحاجة و لا هينقصه مش عارفة الله اعلم و لا يمكن عشان حاسة ان محدش بيهتم باللي كتبته اصلا و لا .......................... يوووووووووووووووووووه بقى اكتمي جاتك القرف

تيجو ننفخ حسني مبارك زي ما نفخنا؟

اما بفكر في حتة فكرة بس هي محتاجة شوية تعب و اكيد هتحصل خساير بس مش مهم الخساير تيجي فينا احنا عشان نكون قدرنا نعمل حاجة لولادنا و منندمش بعد كدة

عارفين ايه الفكرة الاول اقولكو جاتلي منين سمعت عن بلد انا مش فاكرة هي انهو بالظبط المهم الشعب فيها زهقو من رئيسهم و فساده " سبحان الله زينا بالضبط"فعملوا ثورة جامدة جدا و راحوا خدوا زعيم المعرضة و طلعوا على قصر الرئاسة لدرجة ان الرئيس بتاعهم خاف و هرب قبل ما يمسكوه

انا بقى نفسي اعمل كدة عندنا ياه نروح كدة نكسر السجن اللي ايمن نور محبوس فيه هتقولى هيتقتل مننا مش مهم ما الشعب كله لازم يشارك و مش مهم يموت مننا قد ايه المهم نكون قدرنا نعمل حاجة في مصيرنا عشان عيالنا ميشوفوش اللي شوفناه المهم نروح واخدين ايمن نور و نطلع على قصر القبة بس عايزين نلحق قبل ما حسني مبارك يهرب زي التاني عشان هو لو اتمسك انتو عارفين ممكن يحصل فيه ايه

الله الله ياااااااااااااه تخيلو كدة و الله نبقى شجعان لو عملنا كدة بس نفسي اول ما نمسك حسني مبارك اول حاجة نعملها ننفخه و بعدين نعمل زي الانتخابات كدة بس بجد المرة دي و نرشح كذا عقوبة و الناس تروح تختار نعمل فيه ايه و اكتر خمس عقوبات او عشرة ياخدوا اكتر اصوات تتطبق عليه

انا عارفة ان الخطة مش محبوكة اوي بس طبعا عايزين نحبكها اكتر من كدة شوية وتكون مرسومة بدقة شوية

يااااااااااسلااااااااااااام لو دة يحصل

خرفان يا عرب خرفان

و الله ما عارفة اكتب اقول ايه الفلسطينين مش مكفيهم اللي بيحصل فيهم م الامريكان و الصهاينة قامو يضربو في بعض تقريبا مقدروش ع الحمار قدروا ع البردعة و الله حاجة تحزن بس الحمد لله امريكا اتبسطت دلوقتي لما حماس مبقتش الحكومة و بقى الحكم دلوقتي في ايدين العملاء بتوع فتح و دلوقتي قادة العرب و لا بلاش قادة نقول رعاة لان العرب و الحمد لله خرفان المهم دلوقتي القادة او الرعاة دول ارتاحو لان امريكا كانت ماسكالهم العصاية بس و النبي مش عايزين نقول المؤامرة و الدول الغربية بيتفقوا علينا و احنا ابرياء يا عيني احسن بعد كدة الواحد هيورم من الكلام المتخلف دة زي اللي بيقوله و اللي مصدقه

اخيييييييييييرا و الحمد لله رئيس فلسطيني لقى حاجة يعملها ابو مازن استرجل كدة و عمل فيها اوتوبيس رجالة و اقال الحكومة مش تقولو ان ليكو صوت اهو امال قدام كوندي و لا ليفني بتبقو ياريت خرفان لان الخرفان بتتحرك ممكن يبقالها صوت لا بتبقو جزم بدل ما تتفقوا و تقولو الشعب اللي مختار الناس دس بجد -مش زي الانتخابات اللي بتحصل عندنا في مصر يعني- يبقى لازم نساعدهم يعملو حاجة للشعب دة اللي انتو يا بتوع فتح السبب في اللي هم فيه دلوقتي الله يخرب بيت العمالة اللي عاملة فيكو كدة امال لو مكنتش بلدكو محتلة كنتو عملتو ايه اه مانتو من كتر ما كنزتو على قلوبكو من ورا العمالة قلبكو اتعمى اصحو يا عرب اللي بيقولو عليهم الزعماء باعونا بالرخيص اوي اوي اوي هنفوق امتى بقى

خدامين السعودية

انا عارفة ان هيبقى كلامي مكرر لما هتكلم عن الاتفاقية اللي الست الوزيرة عايزة تعملها مع السعودية بس انا اللي غاظني اكتر من الاتفاقية ردود الفعل اللي حصلت انا مش بتكلم عن الناس اللي عارضت الاتفاقية لا اللي غاظني ان فيه ناس بتقول احنا المفروض اننا نبص للاتفاقية بشكل موضوعي واننا فعلا عندنا ستات بيعانو عشان لقمة العيش انا معاهم في كل الكلام دة بس بدل ما هم اتشمللو و اتشطروا و قالو الكلمتين دول ماتشطروش ليه و قالو بدل ما احنا رايحين نتفق مع السعودية نبعتلهم اخواتنا وامهاتنا و بناتنا شغالين تحت شباشبهم "لانهم مبيلبسوش جزم اصلا" ليه ماقالوش ما نوفرلهم شغل هنا و النبي مش عايزة حد متخلف يقولي و هنجيبلهم فلوس منين لاننا عارفين ان الفلوس بتتشفط بقدرة قادر جوة بطون اللي زي الست الوزيرة و بدل ما تشغلهم في البلد بتبعتهم برة عشان تشفط هي و اللي زيها على قد ما يقدروا و الغريب ان السيدة الفاضلة سوزي مانطقتش يعني باسم المرأة زي ما بتقعد تصدع دماغنا و لا المرأة اللي هي بتتكلم عنها دي اللي هى بتقعد معاها في النادي و يروحو مع بعض شرم الشيخ انما اللي بتشتغل عشان تأكل عيالها دي بنت ستين في سبعين و متستاهلش لقب مرأة

انا مبقولش ان احنا مش محتاجين فلوس و اننا معندناش فقر بس بدل ما نذلهم برة بيتنا مانشغلهم هنا و لو انهم برضه مذلولين في بيتهم بس يتذلو في بلدهم احسن ما يتذلو برة لان لما هنذلهم برة احنا كدة مش هنذلهم هم بس لا احنا هنذل مصر كلها و لو انها مذلولة مش بسبب الستات دول لا بسبب الست الوزيرة و افكارها هي و اللي مشغلينها و بسبب الست سوزي بتاعة المرأة و جوزها اللي محدش سمعلهم حس من ساعة الموضوع دة و دة يمكن عشان هم بيحكمو شعب تاني غير الشعب المصري لان الشعب المصري مش من مقامهم و لا انتو مش معايا

دي حاجة تقرف

سيناريو الحزب الوطني في انتخابات مجلس الشورى

دي قصة حقيقية لاجتماع داخل احد افرع الحزب الوطني بمحافظة ما لكيفية تزوير الانتخابات و لو اني مش عارفة هم عاملين الانتخابات دي ليه اصلا مع انها هتتزور هتتزور بس و الله دي قصة حقيقية حكهالي احد اعضاء الحزب الوطني الذي حضر خصيصا ليعرف ما سيحدث في الانتخابات من تزوير بس لو حد فيكو عنده الضغط او القلب ياريت بلاش يقراها عشان الله اعلم ممكن يحصله ايه

رئيس مباحث قسم معين: الو السلام عليكم

عضو بالحزب الوطني في محافظة ما: و عليكم السلام مين معايا؟

رئيس المباحث: معاك ..... رئيس مباحث ......

العضو: خير

رئيس المباحث: احنا عايزينك تحضر اجتماع الحزب عشان الانتخابات اللي جاية

العضو : طب بس الحزب مكلمنيش ليه

رئيس المباحث: اصل الداخلية و المباحث هم اللي ماسكين الموضوع دة

العضو: و انتو جبتو نمرتي منين

رئيس المباحث: مش عيب دة احنا مباحث

العضو: ان شاء الله هاجي

ذهب العضو لحضور الاجتماع فوجد مجموعة من اعضاء الحزب بانتظاره بالاضافة الي رئيس المباحث و رائد شرطة على ما يبدو فاستقبله رئيس المباحث بحفاوة ثم جلس

رئيس المباحث: عايزكو تبقو مصحصحين في اللجان المفروض ان بيكون فيه 14 مندوب كان الاول لازم كل مرشح يكونله مندوب دلوقتي لا رئيس اللجنة بياخد اول المندوبين اللي بيجو عشان كدة عايزكو تكونو الساعة 6ونص امام اللجان و رئيس اللجنة بقى موظف مفيش دلوقتي مستشارين يرأسو اللجان عايزك تكون مصحصح لرئيس اللجنة الله اعلم انتماؤه ايه لو لقيته بيعلم على ورق مثلا لصالح مرشح غير الحزب الوطني امسك ايده و اتصل بيا وانا هاجي اتصرف

ثم يكمل رئيس المباحث: احنا مش عايزين الغلطات اللي حصلت في انتخابات مجلس الشعب تتكرر احنا بنعمل دة كله عشان الدولة

العضو: عشان الدولة ازاي يعني

رئيس المباحث: مش المفروض ان الدولة هي الحزب الوطني و الحزب الوطني هو الدولة و لا ايه؟

العضو يدعي سذاجة: ايوة صح عندك حق

رئيس المباحث : و خلو بالكو مش عايزين اي احتكاك مع الناس عشان في منظمات بتصور اللي بيحصل انما لو لاحظت اي حاجة لصالح اي مرشحين غير الحزب الوطني كلمنا و احنا هنتصرف

رئيس المباحث: يعني مثلا لو لقيت مجموعة كبيرة جايين مع بعض يبقى دول مش جايين لمرشح الوطني تروح معطلهم و بعدين احنا مش هنوقف برة بوكسات او عربيات امن مركزي برة زي كل مرة عشان محدش ياخد باله لا احنا هنوقف عربيات ملاكي و اللي نشك فيه نشده ندخله العربية كانه بيركب عربيته و احنا بقى هنتصرف

العضو: طب و بالنسبة للفرز مش المفروض اننا بنفرز داخل اللجنة و بيكون المندوبين موجودين

رئيس المباحث: لا مالكوش انتو دعوة بالفرز احنا هناخد الصناديق عندنا و احنا هنفرزها بمعرفتنا

انا حبيت احكيلكو عشان لو رحتو انتخبتو كدة يا حلوين تبقو عارفين و تاخدو

احتياطاتكو

حملة مناصرة الاقصى

شوفتو بيان الحملة لمناصرة القدس اللي حكومتنا المبجلة " الله يخرب بيتهم كلهم هم و اللي مشغلهم اللهم جرجر الزعيم القائد بحق جاه النبي" كفاية دعا كدة عليهم احسن لو سبت نفسي ادعى براحتي خالص مش هخلص . المهم الحكومة اللي قولتلكو عليها دي وقفت ان اي حد يروح نقابة الاطباء عشان يوقع عليها المفروض الحملة دي معمولة عشان يجمعو مليون توقيع لمناصرة المسجد الاقصى من جميع الدول العربية لانها هتدور على كل البلاد العربية عشان يجمعو التوقيعات دي. احنا نعمل اللي علينا عشان منقولش بعد كدة ياريتنا عملنا فانت زي الشاطر كدة يا باشا ادخل وقع عليها من النت يالا وقع

http://www.ems.org.eg/hamlet_tawkee_aqsa/Hamla.html

مصيبة في مستشفى الجامعة بالزقازيق

يروي طبيب امتياز بكلية الطب جامعة الزقازيق انه اثناء تدريبه في مستشفى الجامعة بالزقازيق قسم النساء و التوليد حيث تذهب حوالي ما يقرب من مائة سيدة يوميا لتلد في تلك المستشفى و بعد ان تلد مباشرة يضع الطبيب ابنها كما هو على تذكرته بحجة انه كدة الطفل هيتعرف هو ابن مين لما يتحط على تذكرته المصيبة بقى ان طبيعى التذكرة اللي تحت الطفل هتبوش من الدم او السائل حول جسم الطفل ثم لا يعرف هذا ابن مين و تلك ابنة مين و يظلو يسئلو الممرضات و يخمنو و هي الممرضة هتفتكر مين ولا مين مش مهم اهم كلهم عيال و خلاص !!!!!! ألم يتساءلو عما سوف يحدث نتاجا لفعلتهم تلك و الاهمال الذي ممكن ان يصل ان يتزوج اخ من اخته فيما بعد نتيجة لانهم اتلخبطوا بعد الولادة مع العيال التانيين . انا قلت اللي بيحصل و هذا الخبر كما قلت من طبيب امتياز بالمستشفى نفسها و اترككم للتفكير مع انفسكم فيما يحدث كل يوم من مصائب و الكذب الذي يدعي اننا نتقدم و ان مفيش غيرنا في الدول العربية دولة رائدة. بلا نيلة

هتجنن يا جدعان

حاسة ان الامر سينتهي بي اما في احدي المصحات النفسية او المستشفيات العقلية او يمكن اريح نفسي و اللي حواليه وانتحر بقى و اخلص بس برجع اقول اعوذ بالله و نفسي تصعب عليا مش كفاية اللي بيحصلها و هي عايشة و كمان اموتها كافرة عشان تتعذب اكتر. طول الليل هتجنن من التفكير في اللي بيحصل في البلد و اللي عايزة اعمله طب اكتب ع اللي بيحصل اكلم عن ايه و الا ايه عن حقوق الانسان اللي ماشوفتش انتهاك اكتر من كدة لكرامته و لادميته دة الحيوان مبيتعملش معاه كدة و لا الحكومة اللي مش عارفة تعمل معانا ايه و لا ايه عشان تساعدنا في تنظيم الاسرة و الشعب بقتلنا اما تعذيبا في السجون او تعذيبا في المستشفيات او بقتلنا ان ماكنش بالجوع يبقى هتموت بالاكل يعني هتموت هتموت امال انت فاكر الحكومة بتلعب و لو اني افضل اموت من الجوع احسن ما اموت بالسرطان اللي ما شاء الله مغرقين البلد بخيره و الحمد لله مش حارمنا من حاجة و الله ما عارفة اكلم عن ايه و لا ايه و لو اني كنت مرتاحة في الاول مكنش ليه في السياسة ولا نيلة انا اه كنت اعرف و اكلم من بعيد لبعيد بس لما ابتديت بجد اهتم بيها و اقرا قولت مانا كنت كويسة و المصيبة اني مش عارفة اسكت بقى و اقول انا مش ناقصة قرف و مش عايزة اعرف حاجة لا دة انا شكلي بجد هينتهي بي الامر في احدى الخيارات السابق ذكرها تفتكرو اختار ايه؟

اصحواااااااااااا

بيتهيالي لازم نصحى بقى ونصحي اللي حوالينا الناس مش فاهمة حاجة و الله و المصيبة انهم فاكرين ان حسني مبارك يكون رئيس دة امر مسلم بيه و مش محتاج نقاش دة على اساس ان الانتخابات (دة لو فيه انتخابات بجد اصلا) على اساس ان الانتخابات دي امتحان اختر الاجابة الصحيحة و الله زي ما بقولكو لما رحت انتخب السنة اللي فاتت بقى ( معرفش ايه اللي فكرني باليوم دة) المهم لما رحت ساعتها طبعا لقيت واحد ضخم كدة تبع الحزب اللي انتو عارفينه بيشاورلي اعلم على ايه المهم انا علمت على اسم تاني (عايزين تعرفو طبعا ايمن نور) المهم لقيت الست اللي ورايا بتشاورلي و هي فاكرة ان انا جاوبت غلط و بتغششني قولتلها اختاري اللي انتي عايزاه و مشيت لان مكنش فيه مجال افهمها وقتها بس المصيبة اللي عرفتها ان الناس ان مكانوش رايحين وهم مدفوع لهم عشان يدخلو بيدخلو و هم فاكرين انهم رايحين امتحان اختر الاجابة الصحيحة: من هو رئيس مصر الحالي؟
شوفتو مصيبة اكتر من كدة عشان كدة مينفعش نقعد نكلم الناس اللي فاهمة و بس لا لازم كلنا نوصل الحاجات دي للناس الغلابة اللي مش فاهمة حاجة عشان نقدر نوصل لكل الكلام اللي بنطالب بيه لازم نصحي الناس من نومها مش في موضوع الانتخابات بس في كل الفساد و المصايب اللي بتحصل في البلد الناس مش عارفين حقوقهم فين وايه و ازاي و ليه اصلا يطالبو بيهم و دة دور الناس اللي واعية و دة واجب و حاجة مهمة جدا و احدى عناصر و خطوات القضاء على اللي بيحصل في البلد مش هنصحى بقى؟

هي امريكا هتدخل مصر امتى؟

تفتكروا يا جماعة امريكا هتدخل مصر امتى زي ما دخلت العراق. خالي دايما يقول ان شاء الله ( و لاحظوا انه بييقدم المشيئة) ان لما امريكا تدخل مصر انه هيروح يعيش في دبي وان كل واحد لازم يفكر من دلوفتي هو هيروح يعيش فين، والله وجهة نظر برضه. بس انا دايما اقوله مفتكرش ان امريكا هتدخل مصر اصلا لان مصر حبيبتها وهي مش محتاجة قوة عسكرية يعني عشان تدخل مصر الحمد لله من حكمة رئيسنا انه بيسمع الكلام و خلى امريكا تدخل من غير ما تتكلف سنت واحد في قوة عسكرية مالهاش لازمة و هي كدة كدة هتدخل انما صدام حسين عشان كان راجل وحش و مسمعش الكلام زي ريسنا ( يا سلام على حكمته) اتبهدل كدة. ولو كان صدام حسين الله يرحمه سمع كلام رئيسنا الحكيم اللي ياما نصحه مكنش حصله اللي حصل، شوفتو بقى حكمة السيد الرئيس. بس الحمد لله احب اطمنكو يا جماعة ان امريكا راضية عننا و دي اهم حاجة .مش مهم احنا مرضانين ولا الاكل مسرطن ( دة لو لقيناه اصلا) ولا ان شاء الله حتى نولع بجاز المهم ان امريكا راضية علينا ودة كان احدى انجازات السيد الرئيس اللي مأبد فيها و مش عايز يسيبها. اه ما اهو احنا دايما كدة مفيش حاجة عجبانا و مبيملاش عينينا الا الاكل المسرطن.

"العزلة و الفردية "ترجمة

مش علشان انت وحيد ممكن تحس بعزلة او علشان ملكش اصحاب. للاسف انت ممكن تحس بالعزلة حتى وانت بين اقرب الناس ليك الناس اللي بتحبهم اهلك او اصحابك.الاحساس دة صعب جدا خاصة لما بتكون بين الناس اللي بتحبهم. عارف كمان ايه الاوحش انك يكون ليك اصحاب قريبين منك كتير بس مش قادر تتكلم معاهم عن افكارك ومشاعرك عشان انت نفسك مش عايز تكلم حد. كتير اوي بكون عايزة ابقى لوحدي مكلمش حد مشوفش حد. مش محتاجة من اي حد انه يكون موافق على افكاري او معتقداتي بس بكون محتاجة حد يحترم الافكار دي. ليه كل واحد فينا ميتقبلش فكرة ان كل واحد فينا شخص مختلف عنه و عن اي حد تاني و دة اكيد لاننا مش عندنا نفس الافكار او المعتقدات ليه منتقبلش الاخر بمميزاته و عيوبه ليه كل واحد عايز الباقيين يكونو نسخة منه و دة عمره ما هيحصل لان ربنا خالقنا مختلفين ليه منتقبلش افكار الاخر مش شرط نوافقه عليها بس في نفس الوقت منبصلوش على انه انسان غريب او منبوذ لمجرد ان افكاره مختلفة عن الباقيين